MAGGIO di FAUSTO MARSEGLIA

Finalmente è schiuppata ’a primmavera.
Se vede ’o sole già a pprimma matina
e ce sentimmo nu poco cchiù allere
cu ll’aria ca addeventa fina fina.

Tutt’’e ciardine sso cchine ’e sciure
ma scapellèano cchiù forte ’e rrose
ca se tegnono ’e mille culure
e pare ca cantano priose.

Chist’è maggio, ’o mese ’e ll’ammore,
ca vasa ’e vviole ’e mascata nfose,
zennèa cu ‘o sole e appraca ’o core
ca s’allarga mpietto e se scose.

Chist’è maggio, ’o mese d’’a mamma
ca si pure nun le dammo audienza
’e nuje nun se scorda addò stammo stammo
e pure ’a luntano sempe ce penza.

Chist’è maggio, ’o mese d’’e ccerase,
ca guardannole rosse e zucose
ce fanno venì ’o gulìo ’e vase
penzanno a tanta vucchelle azzeccose.

Chist’è maggio, ’o mese d’’a Madonna,
ca vedette ’e murì ’o Figlio ncroce
ma sapenno ca ncielo accussì vonno
 chiagnette ’e dulore senza voce.

Chist’è maggio, ’o mese d’’o rusario
 ca mette npace nu poco ’o core
e spanne ’a devuzione dint’a ll’aria,
facenno suppurtà pure ’o dulore.

Guarde ncantato sti bellezze ovère.
Pienz’ô paraviso e t’arrecrje.
Te siente ll’anema cchiù liggera.
Aìze ll’uocchie e ringrazie a Ddio.

(F.M.)