sabato 1 aprile 2017

ABBRILE di FAUSTO MARSEGLIA


Comm’è fina chest’aria addurosa
ca se spanne p’’a via e dint’ê ccase.
‘A primmavera è già suspirosa
quanno abbrile tuzzulèa e trase.
Mmiez’ê ffronne ll’aucielle cantatore
volano e vernuleano doce
facenno sentì a tutte ll’ore
’a priezza cantata a una voce.
D’’a campagna arriv’’o ppoco ’e viento
c’ammesca addore, culure e sapore
e tra nu suspiro e nu turmiento
arapa ogni core a ll’ammore.
Se vedono ’e schiuppà tanta sciure
for’ê bbalcune e dint’ê ciardine.
‘E ffeneste se vestono ’e culure
ca salutano chi passa vicino.
Nun ze vede cchiù nu punto scuro.
S’allummano ’e bbalcune e ’e ffeneste.
‘O sole spercia pure ‘a dint’’e mure.
Fòre e ddint’ê ccase è tutta na festa.
‘A ggente cammina a deritta e a mmanca
cu ‘a priezza ca se vede nfaccia.
Si pure va ’e pressa nun è maje stanca
e se saluta allarganno ’e bbraccia.
L’ammore t’acchiappa ogni mumento
e mbriaca ‘o core d’’e guagliune.
Abbrile dà curaggio ô sentimento
e ’a ’sta malìa nun se salva nisciuno.
Pure ‘o core mio s’ammolla â sera.
‘E licorde s’affacciano mperiuse.
Ll’anema addeventa cchiù liggera.
E subbeto me trovo ll’uocchie nfuse.
(F.M.)

Nessun commento:

Posta un commento

Lascia il tuo commento