mercoledì 8 giugno 2016

‘A CAPPELLA VUTIVA (FAUSTO MARSEGLIA)




Na cappella vutiva mpont’ ô vico
steva sempe addubbata ‘e sciure.
E si pure sapeva ‘e cose antiche
rigneva ‘a vista ‘e tanta culure.
Dinto ce steva na Marunnella
ca purtava tanta dulore mpietto,
ma bennediceva cu ‘a manella
e ddeva a ll’àte tanto arricietto.
Pareva assaje cuntenta ‘e chisti sciure
e se senteva ‘e sbatterle ‘o core
pe n’ommo ca se ne pigliava cura
cu ddevuzione e vero ammore.
Chist’ommo jeva matina e ssera
e addubbava tutt’ ‘a cappella
cu tanta cura e bbona maniera
fino a che splenneva comme na stella.
S’attardava e ‘un se ne jeva ‘a lla
cuntrullanno si mancava coccosa.
Spisso se fermava pure a prià
accuncianno ll’urdema rosa.
‘A Marunnella parlava cu ll’uocchie
e a isso pareva allungasse ‘e bbraccia.
E allora scunucchiava ‘e ddenocchie
e acalava subbeto ‘a faccia.
Pe gghiuorne chist’ommo ‘un se vedette
e ‘a Marunnella steva senza sciure.
Po’ s’appuraje ca isso murette.
E ‘o vico addeventaje cchiù scuro.
Chist’ommo, ca campava ‘e stiente
fuje atterrato senza nu sciore.
Nun teneva amici e ppariente
e pure muorto pruvava dulore.
Ma nu juorno se truvaje addubbato
cu ‘e sciure, ‘e stesse d’ ‘a Marunnella
comme isso l’aveva sempe accunciato
quann’era vivo nnant’ â cappella.
Mmo spisso succede ca ‘mparanza
se trovano sciure e cannele bbelle
tutte accunciate cu cura annanze
â cchistu muorto e nnant’ â cappella.
(F.M.)

Nessun commento:

Posta un commento

Lascia il tuo commento